Türkmen tarapy nebitgaz ulgamynda netijeli teklipleri hem-de başlangyçlary goldamaga taýýar. Bu barada Prezident Serdar Berdimuhamedow Aşgabada gelen Eýran Yslam Respublikasynyň nebit ministri Jawad Owji bilen geçiren duşuşygynda belledi. Bu barada “Watan” habarlar gepleşiginde habar berildi.
Duşuşygyň barşynda nebitgaz ulgamyndaky hyzmatdaşlyk bilen bagly meseleler ara alnyp maslahatlaşyldy. Umumy pikire görä, bu ulgamda hyzmatdaşlygy has-da giňeltmek üçin täze mümkinçilikler açylýar.
Bu ugurda hyzmatdaşlygyň täze görnüşlerini we usullaryny gözlemek hem-de iş ýüzünde amala aşyrmak boýunça özara pikir alyşmalaryň peýdaly boljakdygyna ynanýaryn diýip, Serdar Berdimuhamedow nygtady we türkmen tarapynyň netijeli teklipleri hem-de başlangyçlary goldamaga taýýardygyny tassyklady.
Işjeň, netijeli ýagdaýda geçen duşuşygyň dowamynda Türkmenistan bilen Eýran Yslam Respublikasynyň arasyndaky hyzmatdaşlygyň hoşniýetli goňşuçylyk, dost-doganlyk we deňhukuklylyk ýörelgeleri esasynda ýokary derejede alnyp barylýandygy kanagatlanma bilen bellenildi.
Iki ýurduň dürli derejedäki hökümet wekiliýetleriniň amala aşyrýan iş saparlary, şeýle hem geçirilýän maslahatlaşmalar we gepleşikler hyzmatdaşlygyň pugtalandyrylmagyna uly goşant goşýar.
Bellenilişi ýaly, Türkmenistan bilen Eýranyň arasynda söwda-ykdysady, ýangyç-energetika, ulag we aragatnaşyk, gurluşyk, oba hojalygy ýaly pudaklarda netijeli gatnaşyklar ösdürilýär, hususy ulgamyň wekilleriniň arasyndaky gatnaşyklar has-da berkeýär.
