30-njy iýula geçilen gije Kamçatkanyň (Russiýa) kenaryndan 161 km uzaklykda 32 km çuňlukda 8,7 bal ululykda ýertitreme bolup geçdi. Bu 1952-nji ýyldan bäri iň güýçli ýertitreme boldy diýip, Russiýanyň Ylymlar Akademiýasynyň Geofizika gullugynyň şahamçasynyň metbugat gullugy habar berdi.
Seýsmiki hadysanyň güýjüni Ýewropa-Ortaýer deňziniň seýsmologiýa merkezi (EMSC) hem tassyklady. Hünärmenler Kamçatkadaky ýertitremeden soň 7,5 bala çenli ululykda güýçli sarsgynlaryň azyndan bir aý dowam etjekdigini belleýär.
Ýerasty sarsgynlardan soň häkimiýetler Kuril adalarynda sunami howpuny yglan etdi. Adatdan daşary ýagdaýlar boýunça ministrlik 32 sm çenli tolkunlaryň bolup biljekdigini duýdurdy we ýaşaýjylara kenardan uzakda durmagy, gämilere bolsa ummana gitmegi maslahat berdi.
Petropawlowsk-Kamçatskiý şäherinde sarsgynlaryň netijesinde çagalar baglarynyň biriniň fasady ýumruldy, şeýle-de käbir sagaldyş merkezleriniň we jemgyýetçilik edaralarynyň binalarynda jaýryklar peýda boldy. Birnäçe adam zyýan çekdi. Häkimiýetler 2,7 müň adamy howpsuz ýerlere ewakuasiýa etdi.
Sunami howpy Ýaponiýada, Çilide, ABŞ-da, Meksikada, Peruwda, Ekwadorda, Hytaýda we beýleki ýurtlarda hem yglan edildi. Käbir sebitlerde ýaşaýjylara howpsuz ýerlere aşmak maslahat berildi. Köp sebitlerde üç metrlik tolkunlar bilen güýçli suwuň gelmegine garaşylýar.
Ýaponiýada “Fukusima-1” AES-den arassalanan suwuň akdyrylmagy togtadyldy, ýurduň merkezi we demirgazyk-gündogar böleginde tiz otlularyň hereketi hem wagtlaýyn bes edildi, Sendaý şäherindäki howa menzili ýapyldy. Bolup geçen hadysadan soň Ýaponiýanyň kenaryna dört kit zyňyldy.
ABŞ-da sunami barada duýduryş Gawaýide yglan edildi. Gawaýiniň häkimiýetleri ýaşaýjylary kenarýaka sebitlerinden gaýtmaga çagyrdy. Gyssagly gulluklar tolkunyň Hanaleýi we adanyň tutuş kenaryny basyp biljekdigini duýdurdy. Milli meteorologiýa gullugynyň maglumatlaryna görä, howp birinji tolkundan soň uzak wagtlap saklanyp biler. Sunami barada duýduryş Alýaskada hem yglan edildi.
