Türkmenistanyň Telekommunikasiýalar we informatika institutyň talyplary we mugallymlary halkara inžener-tehnologik kompaniýalarda tomusky önümçilik tejribesinden geçdiler.
Tejribelik 1–21-nji iýul aralygynda halkara halypalaryň ýolbaşçylygynda Rumyniýada Tenaris, Bosch Zalău, Bosch Jucu we Emerson kompaniýalarynyň binýadynda, şeýle hem institutyň hyzmatdaşynyň — Kluž-Napoka Tehniki uniwersitetiniň barlaghanalarynda geçirildi.
Üç hepdeläp dowam eden tejribelikde talyplar we mugallymlar tassyklanan maksatnama boýunça IT ugurlarynyň dürli meseleleri bilen işlediler. Tejribäniň maksady - nazary bilimleri berkidip, hünär başarnyklaryny ösdürmek, önümçilikde ulanylýan tehnologiýalar we enjamlar bilen tanyşmak, şeýle hem talyplarda özbaşdak işlemek we toparlaýyn işleşmek endiklerini ösdürmek boldy.
Tejribäniň dowamynda talyplar maglumatlary işlemek ulgamynda akylly enjamlaryň işi bilen tanyşdylar we maglumatlary seljermek üçin maglumat-analitiki web-ugurly akylly ulgamyny taýýarladylar.
Tenaris we Emerson kompaniýalarynyň işgärleri bilen duşuşyklaryň dowamynda talyplar olara Türkmenistanyň Prezidenti Serdar Berdimuhamedowyň «Ýaşlar — Watanyň daýanjy» we «Magtymguly» atly kitaplaryny sowgat etdiler. Şeýle hem institutyň wekilleri daşary ýurtly hyzmatdaşlaryna Türkmenistanyň 2025-nji ýylyň şygary — Halkara parahatçylyk we ynanyşmak ýyly barada we ýurduň özara bähbitli halkara hyzmatdaşlygyny pugtalandyrmakdaky goşandy barada gürrüň berdiler.
