Türkmenistanyň Bilim ministrligi tarapyndan Türkmenistanyň Döwlet energetika instituty bilen bilelikde Mary şäherinde «Ýaşlaryň arasynda robot tehnikasy» boýunça bäsleşigiň jemleýji tapgyry guraldy. Bu innowasion bäsleşige ýurdumyzyň ähli sebitlerinden tehnologiýa we innowasiýa gyzyklanma bildirýän ýaşlaryň 140-a golaýy gatnaşdy.
Bäsleşik jemi bäş sany esasy ugur boýunça geçirildi.
- «Päsgelçilikli tizlikli ýaryş» ugrunda Mary welaýat Maliýe-ykdysady orta hünär okuw mekdebiniň talyby Gülälek Gurbannazarowa birinji orna mynasyp boldy.
- «Robot biatlon» ugrunda bolsa Aşgabat şäherindäki «Imdatbot» okuw merkezinden Emir Kulyýew bäsleşigiň ýeňijisi boldy.
- «Robot bouling» bäsleşiginde iň ýokary görkezijini paýtagtymyzyň «Kämil bilim» merkeziniň diňleýjisi Abduljelil Patyşagulyýew gazanmagy başardy.
- «Robot reýs» ugry boýunça geçen bäsleşikde A.S.Puşkin adyndaky türkmen-rus bilelikdäki umumybilim berýän mekdebiniň okuwçysy Alyhan Akgaýew ýeňiş gazandy.
- Mundan başga-da, «Täsin robot» atly döredijilik ugrunda ýene-de 10 sany gatnaşyja ýörite baýraklar gowşuryldy.
Ýeňijilere Türkmenistanyň Bilim ministrliginiň diplomlary we ýadygärlik sowgatlary gowşuryldy.
«Şeýle bäsleşikler ýaşlaryň bilim derejesini ýokarlandyrmaga uly ýardam edýär. Çünki bu ýerdäki iň ýönekeý iş hem mehanikany, fizikany, elektrotehnikany, matematikany we informatikany bilmegi talap edýär. Ýaşlarymyzyň innowasion taslamalary bolsa olaryň bu ugurlary amalyýetde utgaşdyryp bilýändiklerini görkezýär» – diýip, bäsleşigiň eminler toparynyň agzasy Söhbetmyrat Bäşow belledi.
Çäre Türkmenistanyň Döwlet energetika institutynyň «Kuwwat» aýdym-saz toparynyň şowhunly çykyşlary bilen tamamlandy. Gatnaşyjylar we guramaçylar ýaşlara döwrebap bilim almaga döredip berýän şertleri üçin ýurt ýolbaşçylaryna minnetdarlyk bildirdi.
