Daşoguz welaýatynyň Akdepe etrabynyň 53-nji orta mekdebiniň uçurymy, häzirki wagtda Gazagystanyň paýtagty Astanadaky Lew Nikolaýewiç Gumilýow adyndaky Ýewraziýa Milli uniwersitetiniň (ÝMU) 4-nji ýyl talyby Amangeldi Murzaýew “GDA-nyň iň gowy talyby” adyna eýe bolup, halkara derejede uly üstünlik gazandy.
Amangeldi bu ýokary üstünligi üçin ýörite medal, kubok, diplom we şahadatnama bilen sylaglandy.
“GDA-nyň iň gowy talyby” halkara bäsleşigi Gazagystanyň «Bilim-orkenieti» we «Жаңа Қазақстан» innowasion merkezleri tarapyndan ýurduň Bilim ministrliginiň maglumat goldawy esasynda guralýar. Bu at okuwda, ylymda, sportda, döredijilikde we jemgyýetçilik işlerinde aýratyn tapawutlanan, şeýle-de ýaşlar syýasatyny we halkara gatnaşyklary ösdürmäge goşant goşýan işjeň talyplara berilýär.
Amangeldi okuwdaky ýokary netijeleri we jemgyýetçilik işlerindäki işjeňligi bilen öz okaýan uniwersitetinde hem ykrar edilmäge mynasyp boldy. Ol 2026-njy ýylyň maý aýynda geçirilen «Ýewraziýa Ýyldyzy 2026» ýaşlar festiwalynyň çäklerinde “Iň gowy daşary ýurtly talyp — 2026” diýen ugurda ýeňiş gazandy we ÝMU-nyň atly diplomy bilen sylaglandy.
2022-nji ýyldan bäri Astanadaky türkmen talyplarynyň ýolbaşçysy wezipesini ýerine ýetirip gelýän Amangeldi uniwersitetiň festiwallarynda öz ýurdunyň medeniýetini görkezmek bilen, ýokary okuw mekdebiniň işine-de işjeň gatnaşýar.
Amangeldi Murzaýewiň gazanan üstünlikleri Türkmenistanyň Gazagystan Respublikasyndaky Ilçihanasy tarapyndan hem ýörite Minnetdarlyk haty bilen aýratyn bellenildi.
