Hazar deňzi gözegçiligiň bütin taryhynda rekord pes derejä – ýörite Baltika ulgamy boýunça minus 29 metre ýetdi. Şeýle maglumatlary Bütinrussiýa balyk hojalygy ylmy-gözleg institutynyň Hazar şahamçasynyň hünärmenleri berýär diýip, TASS belleýär.
Çuňluklaryň üýtgemegi we gury ýerleriň emele gelmegi sebäpli suwdaky köp organizmleriň ýaşaýyş çägi kem-kemden günorta süýşýär. Suwuň azalandygy, esasan, Russiýanyň we Gazagystanyň kenarlaryny ýuwýan deňziň demirgazyk böleginde has bildirýär. Ol ýerde külke we hazar takgazy ýaly derýa we deňiz balyklarynyň köpelmegi üçin şertleriň ýaramazlaşýandygy hem-de hazar düwlenleriniň sanynyň azalýandygy hasaba alyndy.
Hünärmenleriň maglumatlaryna görä, Hazaryň derejesi 2020-nji ýyldan soň güýçli peselip başlady. Diňe 2022-nji ýyldan 2023-nji ýyl aralygynda 29 sm azaldy. Munuň sebäpleri global ýylamanyň netijesinde suwuň güýçli bugarmagy we guýýan derýalardan suwuň alynmagy boldy. Wolgada suwuň azlygy saklanan ýagdaýynda Hazaryň derejesi geljek bäş-alty ýylyň içinde ýene bir metr aşak düşüp biler.
