4-nji ýanwarda Birleşen Arap Emirlikleriniň Prezidenti Şeýh Mohammed Bin Zaýed Al Nahaýýan bilen duşuşygynyň barşynda Gurbanguly Berdimuhamedow «Türkmengaz» döwlet konserni bilen Abu-Dabiniň Milli nebit kompaniýasynyň (ADNOC) arasynda «Galkynyş» gaz känini işläp geçmek we kompaniýanyň TOPH taslamasyna gatnaşmak boýunça hyzmatdaşlygy has hem işjeňleşdirmek üçin yzygiderli işleri alyp barmagy teklip etdi.
Türkmen halkynyň Milli Lideri Gurbanguly Berdimuhamedow Türkmenistanyň Birleşen Arap Emirlikleriniň «Dragon Oil» kompaniýasy bilen uzakmöhletleýin hyzmatdaşlygynyň bardygyny belläp, Hazar deňziniň türkmen böleginde, hususan-da 19-njy blokda, uglewodorod serişdelerini gazyp almak boýunça türkmen-emirlikler özara bähbitli hyzmatdaşlygy ösdürmek mümkinçiligine seretmegi teklip etdi.
Duşuşygyň dowamynda türkmen tarapynyň beýan eden beýleki teklipleriniň hatarynda, emirlikleriň kompaniýalarynyň ýurdumyzyň gaz-himiýa senagatyny ösdürmek boýunça taslamalara gatnaşmak mümkinçiligi bilen bagly teklip hem bar.
Şeýle hem Türkmenistan bilen BAE-niň arasynda ekologiýa we daşky gurşawyň goragy ugurlary boýunça hyzmatdaşlyk üçin uly mümkinçilikleriň bardygy bellenildi. Serdar Berdimuhamedowyň COP 28 ýokary derejeli maslahatyň dowamynda eden çykyşynda Türkmenistanyň Bütindünýä metan borçnamasyna goşulýandygyny yglan edendigini ýatladyp, Gurbanguly Berdimuhamedow ýurdumyzyň «ýaşyl» energetikany ösdürmek üçin Abu-Dabiniň «Masdar» kompaniýasy bilen hyzmatdaşlyk gatnaşyklaryny has hem işjeňleşdirmäge taýýardygyny aýtdy.
