BAE-niň Ras-el-Haýma Emirliginde ýaýbaňlandyrylan Täze ýyl feýerwerki Ginnesiň rekordlar kitabyna iki ugur boýunça girizildi: ol suwuň ýüzündäki iň uzyn feýerwerk we asmandaky iň uzyn feýerwerk boldy. Bu barada MIR24 Ras-el-Haýmanyň Syýahatçylygy ösdürmek bölümine salgylanyp habar berdi.
Feýerwerk şüweleňi Al-Marjan atly emeli arhipelak bilen Al-Hamra sebitiniň arasyndaky uzynlygy 4,5 kilometre deň bolan kenarýaka zolagynda geçirildi. Suwda oturdylan feýerwerklerden başga-da, müňden gowrak pirotehniki yşyk-diodly dronlar we çylşyrymly uçuş tilsimlerini ýerine ýetirmek üçin ýeňil motorly uçarlar ulanyldy.
Dronlar arkaly ýaýlyma berlen esasy mowzuk Ras-el-Haýmanyň häsiýetli landşafty: çöl, Pars aýlagynyň kenary we Hajar daglary boldy. Dronlar Täze ýyl şüweleňi üçin ýörite ýazylan saz eserleriniň äheňine görä hereket etdiler.
Syýahatçylygy ösdürmek bölüminiň wekili bu çäräniň bary-ýogy sekiz minut dowam edendigini we oňa, takmynan, 50 müň adamyň tomaşa edendigini aýtdy.
2022-nji ýylda hem Emirlikler «Birbada feýerwerk atýan iň köp sanly uzak aralykdan dolandyrylýan dronlar» we «Uzak aralykdan dolandyrylýan dronlar tarapyndan asmanda emele getirilen iň uzyn sözlem» ugurlary boýunça iki dünýä rekordyny goýupdy.
