Türkmen halkynyň Milli Lideri, Türkmenistanyň Halk Maslahatynyň Başlygy, Gurbanguly Berdimuhamedow Täze ýyly maşgala agzalary bilen agzybirlikde garşylady.
Türkmenistanyň Prezidentiniň Täze ýyl Gutlagy tamamlanandan soňra, ak mermerli Aşgabadyň nurana asmanyny baýramçylyk feýerwerki gurşap aldy.
Gurbanguly Berdimuhamedow maşgala agzalary bilen bilelikde asmany ýagtyldyp, adamlaryň kalbynda ýakymly duýgulary oýarýan, täze ýeňişlere ruhlandyrýan şekilleri synlady.
Türkmenistanyň Prezidenti maşgala bolup, agzybirlikde bellenilýän baýrama goşuldy.
Maşgala bolup bellenilýän baýramçylygyň dowamynda Gurbanguly Berdimuhamedowyň agtyklary öz şatlygyny täze döredijilik sowgatlarynyň üsti bilen beýan edip, ene-atalaryny begendirdiler.
Soňra maşgala baýramçylygy dowam etdi. Ilki bilen, Aýjeren atasyndan saz çalyp, goşgy okamaga rugsat bermegini sorady. Ol atasyndan razylyk alandan soňra, saz guralynyň başyna geçip, täze öwrenen sazyny çalýar we ajaýyp goşgy setirleri bilen hemmeleri gutlady. Onuň türkmen, rus, iňlis dillerinde Täze ýyl gutlagyny aýtmagy ene-atanyň agtygyna bolan buýsanjyny artdyrdy.
Gurbanguly Berdimuhamedowyň Mähriban atly agtyjagy bolsa babasyna Täze ýyl mynasybetli daşary ýurt sazlarynyň birini çalyp berdi.
