4-nji dekabrda Türkmenistanyň Adatdan daşary we Doly ygtyýarly ilçisi Esen Aýdogdyýew Russiýa Federasiýasynyň Prezidenti Wladimir Putine ynanç hatyny gowşurdy.
Uly Kreml köşgüniň Aleksandrow zalynda geçirilen daşary ýurtly ilçilerden ynanç hatlaryny kabul etmek dabarasynyň barşynda eden çykyşynda Wladimir Putin dostlukly Türkmenistan bilen köpugurly hyzmatdaşlygyň işjeň ösdürilýändigini belledi.
Syýasy we ykdysady aragatnaşyklar parlamentleriň, sebitleriň we jemgyýetçiligiň ugry boýunça aragatnaşyklaryň giň toplumy bilen doldurylýar. Ynsanperwer ulgam babatda agzap, Putin Russiýa-türkmen uniwersitetiniň döredilmegini we Aşgabatda Döwlet rus drama teatrynyň täze binasynyň gurulmagyny we Puşkin adyndaky umumy bilim berýän bilelikdäki mekdebiň goşmaça korpusynyň gurulmagyny belläp geçdi. Bu barada Kremliň resmi saýtynda habar berilýär.
«Russiýa Türkmenistanyň hemişelik Bitaraplyk syýasatyna hormat bilen garaýar. Biz köpugurly meýdançalarda, ilkinji nobatda bolsa, GDA-nyň, «hazar bäşliginiň» we «Merkezi Aziýa + Russiýa» formatynyň çäklerinde özara bähbitli netijeli hyzmatdaşlygymyzy dowam etmäge taýýar» diýip, Wladimir Putin belledi.
