Şuşada «Türki dünýäsiniň medeni syýahatçylygynyň geljegi» atly halkara ylmy maslahat geçirilýär.
Report agentliginiň habar berşi ýaly, Azerbaýjanyň Döwlet syýahatçylyk agentligi we Türki Döwletleriň Guramasy (TDG) tarapyndan geçirilýän çäräniň maksady türki dilli döwletleriň bilelikdäki syýahatçylyk önümlerini we ugurlaryny döretmek barada pikir alyşmakdan, şeýle-de bu ugurda hyzmatdaşlygyň geljegini ara alyp maslahatlaşmakdan ybarat.
Çärä resmi guramalaryň wekilleri, Azerbaýjanyň, Türkiýäniň, Gazagystanyň, Gyrgyzystanyň, Özbegistanyň, Türkmenistanyň, Wengriýanyň medeni miras boýunça hünärmenleri gatnaşýar. TDG agza ýurtlaryň wekilleri “Türki dilli ýurtlaryň çarwa durmuşyny syýahatçylyk önümine öwürmek” mowzugy bilen çykyş etdiler.
Çäräniň çäklerinde Azerbaýjanyň, Türkiýäniň, Gazagystanyň, Gyrgyzystanyň, Özbegistanyň we Türkmenistanyň milli tagamlarynyň tanyşdyrylyşy geçirildi.
