Prezident Serdar Berdimuhamedow BMG-niň Howanyň üýtgemegi baradaky Çarçuwaly konwensiýasyna gatnaşyjy taraplaryň 28-nji maslahatyna (COP-28) gatnaşmak üçin 1-2-nji dekabrda Birleşen Arap Emirliklerinde iş saparynda bolar. Bu barada 30-njy noýabrda geçirilen Hökümet mejlisiniň barşynda habar berildi.
«Watan» habarlar gepleşiginde bellenilişi ýaly, wise-premýer, daşary işler ministri R.Meredow Türkmenistanyň Prezidentiniň BAE boljak iş saparyna taýýarlyk görlüşi barada hasabat berdi. Bu Bütindünýä forumy Dubaýda şu ýylyň 30-njy noýabry – 12-nji dekabry aralygynda geçiriler.
Serdar Berdimuhamedow Bütindünýä howa forumynyň möhümdigini nygtady. Onuň gün tertibine dünýäniň durnukly ösüşini üpjün etmek, tutuş adamzadyň geljegi üçin uly ähmiýete eýe bolan meseleler giriziler. Türkmenistan möhüm ykdysady wezipeleri çözmekde jogapkärli we işjeň orun eýeleýändigini görkezýär. Ýurdumyzyň wekiliýetiniň COP-28 maslahatyna gatnaşmagy hem munuň aýdyň subutnamasydyr.
Döwlet Baştutany Dubaýda geçiriljek Bütindünýä forumynda ýurdumyzyň bu ugurda netijeli halkara hyzmatdaşlygy mundan beýläk-de ösdürmäge gönükdirilen başlangyçlarynyň beýan ediljekdigini, şeýle hem onuň çäklerinde ikitaraplaýyn duşuşyklaryň we beýleki çäreleriň meýilleşdirilýändigini belläp, sapara ýokary guramaçylyk derejesinde taýýarlyk görülmegini üpjün etmegi tabşyrdy.
