14 – 16-njy noýabrda söwda we daşary ykdysady aragatnaşyklar ministri Begenç Goçmollaýewiň ýolbaşçylygyndaky türkmen wekiliýeti Osaka şäherinde EKSPO – 2025 Bütindünýä sergisiniň halkara gatnaşyjylarynyň duşuşygyna gatnaşdy.
Çäräniň dowamynda Türkmenistanyň wekiliýeti Ýaponiýanyň öňdebaryjy kompaniýalarynyň wekilleri, şeýle-de Halkara sergi býurosynyň baş sekretary Dimitriý Kerkenses, Ýaponiýanyň ykdysadyýet, söwda we senagat ministriniň orunbasary Isii Taku we EKSPO – 2025 Bütindünýä sergisiniň Ýaponiýa assosiasiýasynyň baş sekretary Isige Hiroýuki bilen möhüm duşuşyklary geçirdi diýip, Halkara habarlar merkezi habar berdi.
Gepleşikleriň esasy mowzuklarynyň biri Türkmenistanyň bu çärä taýýarlyk görmekdäki üstünligi boldy. Ýapon tarapy zerur resminamalaryň öz wagtynda tabşyrylandygy üçin minnetdarlyk bildirdi we Türkmenistanyň bu sergä gatnaşmagynyň wajyplygyny belledi.
Milli pawilýonyň gurluşygy üçin ýer bermek dabarasyna aýratyn üns berildi. Türkmenistana ýer bölegi resmi taýdan 2023-nji ýylyň 16-njy noýabrynda gündiz berildi. Resminamanyň gowşurylyşy ýerli we daşary ýurt KHBS-iniň wekilleriniň gatnaşmagynda bolup geçdi.
