Şu gün, 14-nji noýabrda irden Prezident Serdar Berdimuhamedow dikuçarda paýtagtymyz boýunça uçuşy amala aşyryp, Aşgabatda we onuň töwereklerinde alnyp barylýan işler bilen tanyşdy. Bu barada «Watan» habarlar gepleşiginde habar berildi.
Döwlet Baştutanynyň ýanynda senagat-gurluşyk toplumyna gözegçilik edýän wise-premýer B.Annamämmedow boldy.
Döwlet Baştutany uçuşynyň dowamynda Aşgabadyň täze gurluşyklarynda alnyp barylýan işleriň depginlerini, paýtagtymyzy durmuş-ykdysady taýdan ösdürmäge gönükdirilen giň möçberli özgertmeleriň durmuşa geçirilişini, şeýle hem Arkadag şäheriniň çäklerinde ýaýbaňlandyrylan işleriň gidişini synlady.
Soňra döwlet Baştutanynyň dikuçary Aşgabadyň günbatar künjegine tarap ugur aldy. Serdar Berdimuhamedow guş uçar belentlikden Büzmeýin etrabynyň çäklerinde gurlan dürli maksatly binalary, häzirki zaman talaplaryna laýyk gelýän ýaşaýyş jaý toplumlaryny we häzirki döwürde gurluşygy batly depginlerde dowam edýän toplumlarda alnyp barylýan gurluşyk işlerini synlap, gurluşyklarda ýokary hil derejesiniň üpjün edilmeginiň wajypdygyna ünsi çekdi.
Soňra Serdar Berdimuhamedowyň dikuçary Arkadag şäheriniň ýokarsynda öwrüm etdi. Häzirki döwürde täze şäheriň gurluşygynyň ikinji tapgyrynyň işlerine badalga berildi.
Döwlet Baştutany Arkadag şäherinden paýtagtymyza tarap barýarka türkmen halkynyň beýik geçmişiniň şaýady bolan Parfiýa döwletiniň merkezi Nusaý galasyny synlady.
Serdar Berdimuhamedowyň dikuçary, ilki bilen, häzirki wagtda gurluşygy batly depginlerde dowam edýän Stomatologiýa merkeziniň ýokarsynda öwrüm etdi.
Şeýle hem Serdar Berdimuhamedow şäheriň merkezi künjeginde ýerleşýän seýilgäh zolagy we onuň çäklerinde bar bolan ugurdaş desgalary synlady we seýilgähiň arassaçylyk, abadançylyk derejesini yzygiderli gözegçilikde saklamagy tabşyrdy.
Soňra dikuçary Halkara fiziologiýa ylmy-kliniki merkeziniň gurluşygynyň dowam edýän künjegine tarap ugur aldy.
Wise-premýer döwlet Baştutanyna häzirki döwürde paýtagtymyzyň okgunly ösýän künjegi bolan “Parahat” ýaşaýyş toplumynda alnyp barylýan işleriň ýagdaýy, bu ýerde halkymyzyň abadan durmuşynyň üpjün edilmegine gönükdirilen maksatnamalaryň durmuşa geçirilişi hem-de dürli maksatly binalarda dowam edýän gurluşyk işleri barada hasabat berdi.
