Mary şäherini 2027-nji ýylda “Ykdysady Hyzmatdaşlyk Guramasynyň syýahatçylyk paýtagty” diýip yglan etmäge gönükdirilen çäreleri görmek teklip edildi. Bu barada wise-premýer, daşary işler ministri R.Meredow habar berdi.
Ministr Türkmenistanyň Prezidentiniň Daşkentde geçirilen YHG-nyň 16-njy sammitinde öňe süren başlangyçlaryny iş ýüzünde durmuşa geçirmek üçin taýýarlanan ýene birnäçe teklipleri hödürledi.
Şeýlelikde, 2024-nji ýylyň birinji çärýeginde Arkadag şäherinde durnukly ösüş boýunça YHG-nyň ilkinji ministrler forumyny geçirmeklik teklip edildi. Şeýle hem olaryň hatarynda, üstaşyr ýük daşamak we onuň Teswirnamasy boýunça YHG-nyň Çarçuwaly Ylalaşygyny tassyklamak üçin edilmeli işler bar.
Serdar Berdimuhamedowyň sammitde eden çykyşynda serhetüsti we sebitleýin söwdany güýçlendirmek meselesi gozgaldy. Bu işe YHG-nyň hünärmenleriniň gatnaşmagy bilen serhetüsti söwda zolaklaryny döretmek meselesini öwrenmek teklip edildi.
