3-nji noýabrda Balkan welaýatynda iş saparyny amala aşyran Prezident Serdar Berdimuhamedow «Çalik Holding A.Ş» kompaniýalar toparynyň Dolandyryjylar geňeşiniň başlygy Ahmet Çalygy kabul etdi.
Duşuşygyň dowamynda hyzmatdaşlygyň häzirki ýagdaýyny hem-de geljekki mümkinçiliklerini ara alyp maslahatlaşmagyň barşynda işewür kompaniýa ynanylan desgalarda alnyp barylýan işler we ozal berlen tabşyryklaryň ýerine ýetirilişi barada giňişleýin maglumat berdi.
«Çalik Holding A.Ş» kompaniýalar topary üçin ýurdumyz bilen hyzmatdaşlygy dowam etmegiň uly mertebedigini aýdyp, Ahmet Çalyk döwlet Baştutanyna öz ýolbaşçylyk edýän holdingine täze iri taslamanyň – kuwwaty 1574 megawatta deň bolan häzirki zaman utgaşykly elektrik stansiýasynyň gurluşygynyň ynanylandygy üçin tüýs ýürekden hoşallyk bildirdi. Işewür türk hyzmatdaşlarynyň geljekde hem öz üstlerine alan borçnamalarynyň ýerine ýetirilmegine örän jogapkärli çemeleşjekdiklerine hem-de ähli işleriň bellenilen möhletlerde we ýokary hilli ýerine ýetiriljekdigine ynandyrdy.
