Türkmenistanyň Halk Maslahatynyň Başlygy Gurbanguly Berdimuhamedow Türki Döwletleriň Guramasynyň 10-njy Sammitine gatnaşmak üçin 3-nji noýabrda Gazagystan Respublikasyna iş saparyny amala aşyrar. Bu barada wise-premýer, daşary işler ministri R.Meredow Hökümet mejlisiniň barşynda habar berdi.
Sammit Astana şäherinde geçiriler. Saparyň çäklerinde şeýle hem türkmen halkynyň Milli Lideri, Türkmenistanyň Halk Maslahatynyň Başlygynyň Gazagystan Respublikasynyň Prezidenti bilen duşuşygy meýilleşdirilýär.
Belläp geçsek, Türkmenistan 2021-nji ýylyň 12-nji noýabrynda bu Gurama synçy hökmünde goşuldy. Mälim bolşy ýaly, Gurbanguly Berdimuhamedow Türki Döwletleriň Guramasynyň Ýaşulular Geňeşiniň agzasy bolup durýar we bu düzümiň işine işjeň gatnaşýar. Häzirki wagtda türkmen tarapynyň Türki döwletleriň söwda-senagat edaralarynyň birleşigine girmegi bilen bagly degişli işler geçirilýär.
