1-nji noýabrda Prezident Serdar Berdimuhamedow Gazagystan Respublikasynyň Premýer-ministriniň orunbasary, daşary işler ministri Murat Nurtleuny kabul etdi.
Serdar Berdimuhamedow we Gazagystan Respublikasynyň Premýer-ministriniň orunbasary, daşary işler ministri Murat Nurtleu dostluk we hoşniýetli goňşuçylyk gatnaşyklarynyň berk binýadyna daýanýan, uzakmöhletleýin we strategik häsiýete eýe bolan ikitaraplaýyn hyzmatdaşlygyň giň meselelerini ara alyp maslahatlaşdylar.
Biziň ýurtlarymyz BMG, ÝHHG, GDA, YHG ýaly we beýleki iri halkara we sebit guramalarynyň çäklerinde oňyn hyzmatdaşlyk edýärler. Şeýle hem Merkezi Aziýa döwletleriniň Baştutanlarynyň konsultatiw duşuşyklary formaty özüniň netijeliligini tassyklady. Şunuň bilen baglylykda, döwlet Baştutany mümkinçilikden peýdalanyp, Gazagystan Respublikasyna öňde Astana şäherinde geçiriljek Türki döwletleriň guramasynyň 10-njy Sammitini üstünlikli geçirmegi arzuw etdi.
Ulag-logistika ulgamy hyzmatdaşlygyň möhüm ugurlarynyň hatarynda görkezildi. Şeýle hem energetika pudagy hyzmatdaşlygyň ileri tutulýan ugurlarynyň hatarynda kesgitlenildi.
Şunuň bilen birlikde, ikitaraplaýyn ynsanperwer gatnaşyklaryň pugtalandyrylmagyna uly ähmiýet berilýär. Özara Medeniýet günlerini, festiwallary guramak tejribesiniň dowam etdirilmeginiň, döredijilik we ylmy işgärleriň arasynda yzygiderli gatnaşyklaryň giňeldilmeginiň bu ugurda köpýyllyk netijeli hyzmatdaşlygyň baýlaşdyrylmagyna ýardam berýär.
