The Astana Times gazetiniň habar bermegine görä, Türkmenistanyň Prezidenti Serdar Berdimuhamedow Türki döwletleriň guramasynyň 10-njy ýubileý sammitine gatnaşmak üçin Gazagystanyň paýtagtyna barar.
Sammite Türkmenistanyň, Azerbaýjanyň, Gyrgyzystanyň, Türkiýäniň, Özbegistanyň we Wengriýanyň döwlet ýolbaşçylary gatnaşar. Duşuşygyň dowamynda agza döwletleriň Baştutanlary we guramanyň synçylary ykdysadyýet, medeni gatnaşyklar hem-de sebitde durnuklylygy üpjün etmek ýaly dürli meseleleri ara alyp maslahatlaşarlar.
Çäräniň özi «agza ýurtlaryň we synçy ýurtlaryň Baştutanlarynyň türki ýurtlaryň arasyndaky hyzmatdaşlygy we özara düşünişmegi güýçlendirmek boýunça möhüm ýygnagy bolar» diýip bellenilýär.
Türki döwletleriň guramasynyň 9-njy sammiti Samarkantda geçirilipdi. Onuň dowamynda taraplar möhüm kararlary we olary durmuşa geçirmegiň gurallaryny öz içine alýan Samarkand Jarnamasyny kabul edipdiler. Şeýlelik bilen, döwlet baştutanlary, takmynan, 10 sany möhüm resminama gol çekdiler we başlangyç maýasy ýarym milliard amerikan dollary bolan bilelikdäki maýa goýum gaznasyny döretmäge razy boldular.
