25-nji oktýabrda Ankaradaky Prezident toplumynda Türkiýäniň wise-prezidenti Jewdet Ýilmaz bilen Türkmenistanyň Ministrler Kabinetiniň Başlygynyň orunbasary B.Atdaýewiň arasyda gepleşikler geçirildi. Bu barada Anadolu agentligi habar berýär.
Bellenilişi ýaly, duşuşygyň dowamynda iki ýurduň arasyndaky ykdysady, syýasy we medeni-ynsanperwer ugurlardaky gatnaşyklary pugtalandyrmak barada pikir alşyldy.
J.Ýilmaz Türkiýe bilen Türkmenistanyň arasyndaky söwda dolanyşygynyň mukdaryny 5 milliard amerikan dollaryna ýetirmegi maksat edinýändiklerini we bu maksada ýetmek üçin söwda amallaryny ýeňilleşdirjek çäreleri, esasanam, töleglere gaýtadan serediljekdigini, olaryň uzak möhlete esaslanjakdygyny aýtdy. Şunda Hökümetara türkmen-türk ykdysady toparynyň mejlisleriniň işine möhüm ornuň degişlidigi bellenildi.
Wise-premýer B.Atdaýew iki ýurduň arasynda häzirki wagtda alnyp barylýan söwda-ykdysady hyzmatdaşlygyň derejesini ýokary baha berdi we özara söwda dolanyşygynyň mukdaryny 5 milliard amerikan dollaryna çenli ýetirmekde bilelikde iş alyp barmaga taýýardygyny mälim etdi.
Duşuşyk Türkmenistanyň Prezidenti Serdar Berdimuhamedowyň Türkiýä resmi saparynyň çäklerinde geçirildi.
