Kanadanyň «Klick Labs» tehnologiýalar kompaniýasynyň hünärmenleri emeli intellektiň esasynda adamyň sesinden 2-nji derejeli süýji keseliniň (diabetiň) bardygyny kesgitläp bilýän gural döretdiler.
Bu guraly döredijileriň bellemeklerine görä, diagnoz goýmak üçin programma diňe 6 – 10 sekunt aralygynda dowam edýän ses ýazgysy, şeýle hem saglyk ýagdaýy, jynsy, ýaşy, boýy we agramy baradaky esasy maglumatlar gerek. Model aýallar üçin 89%, erkekler üçin 86% takyklyk görkezdi.
Barlagyň çäklerinde hünärmenler 267 sany meýletinçini saýlap aldylar, olaryň içinde 2-nji derejeli süýji keseli bolanlar hem, sagdyn adamlar hem bar. Olardan iki hepdäniň dowamynda günde alty gezek öz smartfonlaryna sözlemleri ýazga almagy haýyş etdiler. Soňra alymlar 18 müňden gowrak ses ýazgysyny seljerip, keseliň bardygyny görkezýän 14 akustiki aýratynlygy kesgitlediler.
«Biziň barlagymyz 2-nji derejeli süýji keseli bolan we bolmadyk adamlaryň sesleriniň arasyndaky düýpli tapawutlary ýüze çykarýar, munuň özi lukmançylyk jemgyýetiniň bu keseli anyklaýyş usulyny üýtgedip biler» diýip, «Klick Labs» kompaniýasynyň ylmy işgäri Jeýsi Kaufman belläp geçdi.
Halkara diabet federasiýasynyň maglumatlaryna görä, dünýädäki diabet bilen kesellän 480 million adamyň her ikinjisi diýen ýaly özlerinde bu keseliň bardygyny bilmeýär. Şunuň bilen birlikde, 90% ýagdaýda bu 2-nji derejeli süýji keselidir.
