Günüň ýüzündäki tegmilleriň sany mese-mälim azaldy, şonuň üçin magnit hadysalary boýunça ýagdaý amatly bolmagynda galýar.
Deslapky çaklamalardan tapawutlylykda, Gündäki asudalyk dowamly bolup biler. Oktýabr aýynda güýji orta derejeli gün partlamalarynyň diňe alty sanysy hasaba alnan bolsa, sentýabr aýynda olaryň sany 34-e ýetipdi.
Geomagnit işjeňligi gowşady we güýzüň ikinji aýynda Ýerde diňe bir sany gysga magnit tupany boldy.
Russiýanyň Ylymlar akademiýasynyň Kosmos gözlegleri institutynyň baş ylmy işgäri, fizika-matematika ylymlarynyň doktory Sergeý Bogaçýowyň gürrüň bermegine görä: "Ýylyň işjeňligine garasaň, ol birneme alabeder: gara zolak, ak zolak, ýagny partlama zolagy, asudalyk zolagy".
"Biz asuda ýagdaýyň dowam edýändigini bellige alýarys. Ondan çykyljakdygynyň alamatlaryny göremzok. Adamlar bu maglumatlardan, megerem, hoşal bolsalar gerek, sebäbi olara partlamalar we alawlar däl-de, asuda Gün gerek" – diýip, ol sözüniň üstüni ýetirdi.
Bu günler Günde tegmilleriň diňe 3458, 3464 we 3465 belgili üç toparyna syn etmek bolýar, ýöne olaryňam işjeňligi gaty pes. Ýyldyzyň ýüzüniň galan bölegi arassa. Günüň gyrasynda täze tegmiller peýda bolup ugran gündogar (çep) ýarym şarynda häzirki wagtda hiç hili gurluş ýok.
Oktýabr aýynyň soňky hepdesi ýylyň iň asuda hepdelerinden biri bolaýjak ýaly. Şeýle-de bolsa, Gün hökman öz işjeňligine gaýdyp geler. Ýöne ol noýabrdan bärde bolmaz.
