Gruziýanyň Geosky Airlines kompaniýasynyň uçary 13-nji oktýabrda Türkmenabat şäheriniň Halkara howa menzilinde ilkinji gonuşy amala aşyrdy. Häzirki wagtda bu awiakompaniýa iki ýurduň ilçihanalarynyň goldawy bilen Tbilisi (Gruziýa) – Çžençžou (Hytaý) – Türkmenabat (Türkmenistan) – Saragosa (Ispaniýa) – Tbilisi (Gruziýa) ugry boýunça ýük gatnawlaryny amala aşyryp başlady.
Türkmenistan bilen Gruziýanyň arasynda ýük awiagatnawlarynyň ýola goýulmagy Ýewropa-Aziýa ugrunda we yzyna üstaşyr geçiş mümkinçiliklerini giňeldýär.
Türkmenistan Gruziýa bilen köptaraplaýyn gatnaşyklaryň mundan beýläk-de ösdürilmegini, şeýle-de Aziýa, Kawkaz we Ýewropa ýurtlary bilen netijeli ulag hyzmatdaşlygyny ösdürmegi ileri tutulýan ugurlaryň biri hasaplaýar. Täze halkara ýük awiagatnawynyň açylmagy munuň aýdyň subutnamasydyr.
Şu mynasybetli Türkmenistanyň Gruziýadaky ilçisi Döwletmyrat Seýitmämmedow Geosky Airlines kompaniýasynyň ýolbaşçylary bilen onlaýn duşuşyk geçirdi.
Duşuşykda Gruziýany Aziýa we Ýewropa şäherleri bilen baglanyşdyrýan Türkmenabadyň Halkara howa menziliniň, ilkinji nobatda, amatly geografiki ýerleşişi, ýagny Aziýa bilen Ýewropany birleşdirýän howa, demirýol we awtomobil ýollarynyň çatrygynda ýerleşmegi netijesinde üstaşyr nokady hökmünde ulanyljakdygy bellenildi.
