Aşgabatda şu ýylyň mart aýynda başlan «Ýokary tehnologiýalar we innowasion işläp taýýarlamalar» atly halkara bäsleşigiň ýeňijileri yglan edildi. Bäsleşige dünýäniň dürli ýurtlaryndan ýaş alymlar gatnaşdy, olardan 45-isi bolsa baýrak alanlaryň hataryna goşuldy.
Bäsleşikde Azerbaýjandan, Belarusdan, Wýetnamdan, Gruziýadan, Gazagystandan, Hytaýdan, Malaýziýadan, Täjigistandan, Türkiýeden we Özbegistandan, şeýle-de Türkmenistandan ýaş alymlar, oýlap tapyjylar we hünärmenler isleg bildirilýän ugurlar boýunça öz taslamalaryny we ylmy işlerini hödürlediler. Bäsleşigi gurnaýjy bolup Türkmenistanyň Ylymlar Akademiýasy, Bilim Ministrligi we Magtymguly adyndaky Ýaşlar guramasynyň Merkezi Geňeşi çykyş etdi.
Bäsleşigiň netijesi boýunça, dürli ýurtlardan 45 taslama awtory ýeňiji boldy. Orunlar aşakdaky ýaly paýlandy:
I orun – 9 adam;
II orun – 14 adam;
III orun – 22 adam.
Ýeri gelende bellesek, 9 sany ýokary baýraga eýe bolanlaryň 6-sy Türkmenistandandyr:
- Söwer Serdarow — Türkmenistanyň Oguz han adyndaky inžener-tehnologiýalar uniwersitetiniň 4-nji ýyl talyby.
- Gülnar Öwezdurdyýewa — Türkmenistanyň Oguz han adyndaky inžener-tehnologiýalar uniwersitetiniň 4-nji ýyl talyby.
- Halmyrat Orunbaýew — Türkmenistanyň Ylymlar akademiýasynyň Tehnologiýalar merkeziniň Nanotehnologiýalar laboratoriýasynyň müdiri.
- Jennet Ataýewa — Magtymguly adyndaky TDU-nyň Organiki himiýa kafedrasynyň mugallymy.
- Aýjahan Welýanowa — S.Seýdi adyndaky Türkmen döwlet mugallymçylyk institutynyň Biologiýa we okatmagyň usulyýeti kafedrasynyň mugallymy.
- Batyr Hançaýew — Türkmenistanyň Döwlet energetika institutynyň bilermeni.
- Kou Ýuýsýuan — Sian uniwersitetiniň Geljegiň tehnologiýalary mekdebiniň aspiranty.
- Suhrob Ýusupow — Özbegistan Respublikasynyň Ylymlar akademiýasynyň Umumy we organiki däl himiýa institutynyň 2-nji ýyl doktoranty.
- Parwinaý Olimboýzoda — Täjigistanyň Tehnologiýalar uniwersitetiniň Ylym we gollanmalar kafedrasynyň doktoranty, tehniki ylymlaryň kandidaty.
