26-njy sentýabrda Prezident Serdar Berdimuhamedow «Cifal» kompaniýasynyň prezidenti Žil Remini kabul etdi. Bu barada «Watan» habarlar gepleşiginde habar berildi.
Duşuşygyň barşynda soňky ýyllarda ýurdumyzyň halk hojalyk toplumyny senagatlaşdyrmaga we düýpli döwrebaplaşdyrmaga ugur alandygy nygtaldy. Türkmenistan daşary ykdysady gatnaşyklary mundan beýläk-de giňeltmäge gönükdirilen daşary syýasy strategiýany durmuşa geçirip, maglumat tehnologiýalary, oba hojalygyny sanlylaşdyrmak, suw tygşytlaýjy we ýaşyl tehnologiýalary ulanmak ulgamynda öňdebaryjy daşary ýurt tejribesini çekmäge aýratyn ähmiýet berýär.
Şundan ugur alyp, türkmen tarapynyň fransuz kompaniýalarynyň gazananlaryny mundan beýläk-de ösdürmäge gyzyklanma bildirýändigi bellenildi we frnasuz hyzmatdaşlarynyň anyk tekliplerine garamaga taýýardygy tassyklanyldy.
«Cifal-yň » täze bilelikdäki taslamalary amala aşyrmaga gyzyklanma bildirýändigini nygtap, Žil Remi ýolbaşçylyk edýän kompaniýasynyň öz üstüne alan hyzmatdaşlyk borçnamalaryny ýerine ýetirmäge berk eýerjekdigine ynandyrdy.
