Şu gün, 26-njy sentýabrda Ýewropa Bileleşiginiň Türkmenistanda täze bellenen Adatdan daşary we Doly ygtyýarly ilçisi hanym Beata Peksan Prezident Serdar Berdimuhamedowa ynanç hatyny gowşurdy. Bu barada «Watan» habarlar gepleşiginde habar berildi.
Duşuşygyň dowamynda şu ýyl Türkmenistan bilen Ýewropa Bileleşiginiň arasynda diplomatik gatnaşyklaryň ýola goýulmagyna 30 ýyl bolandygy bellenildi we şol geçen ýyllaryň dowamynda ýurdumyzyň we Ýewropa Bileleşiginiň arasyndaky däp bolan dostlukly gatnaşyklaryň özara ynanyşmak we açyklyk ýörelgeleri esasynda üstünlikli ösdürildi.
Prezident Serdar Berdimuhamedow ýaňy-ýakynda Nýu-Ýork şäherinde BMG-niň Baş Assambleýasynyň 78-nji sessiýasynyň çäklerinde Ýewropa Geňeşiniň Başlygy Şarl Mişel bilen bolan duşuşygynda hyzmatdaşlygyň giň ugurlary boýunça pikir alyşmalaryň bolandygyny we bu hyzmatdaşlygyň ägirt uly mümkinçilikleriniň bardygyny belledi. Ulag ulgamy, energetika we “ýaşyl tehnologiýalar” hyzmatdaşlygyň geljegi uly ugurlarynyň hatarynda görkezildi.
Döwlet Baştutany ýurdumyzyň Ýewropa Bileleşigi bilen hyzmatdaşlyga ýokary baha berýändigini belläp, bu netijeli gatnaşyklary mundan beýläk-de pugtalandyrmaga taýýardygyny tassyklady.
