BMG-niň Ösüş maksatnamasynyň wekilhanasy Türkmenistanyň Saglygy goraýyş we derman senagaty ministrligine 4D wizuallaşdyrma mümkinçiligi bolan 20 sany ultrases barlaglary (USB) üçin enjamlary berdi. Ol Bütindünýä banky tarapyndan maliýeleşdirilýän “Türkmenistanda COVID-19-a jogap” taslamasynyň çäklerinde geçirildi diýip, ORIENT habar berýär.
Umuman, 790 müň dollardan gowrak bahaly enjamlar we sarp ediş materiallary berildi. Enjamlar kämilleşdirilen funksionala eýe bolup, hakyky wagtda 4D wizuallaşdyrma mümkinçiligi bolan esasy aýratynlygyndan başga-da, dopplerografiýa geçirmek, dokumanyň häsiýetini awtomatik kesgitlemek we şekili ýokary hilli bermek mümkinçilikleri bilen häsiýetlendirilýär diýip, BMGÖM-iň metbugat gullugy habar berýär.
Täze USB enjamlary içerki organlaryň, damar keselleriniň, adamyň reproduktiw funksiýasynyň keselleriniň diagnostikasyny, göwreliligiň we düwünçegiň ösüşiniň diagnostikasyny ep-esli gowulandyrar.
Bellenilişi ýaly, enjamlar ulanylyş üçin paýtagt we welaýat hassahanalaryna eýýäm gowşuryldy, guramanyň özi bolsa Türkmenistanyň milli saglygy goraýyş ulgamyna mundan beýläk-de goldaw bermegi we hödürlenýän hyzmatlaryň hilini ýokarlandyrmak üçin ýurduň lukmançylyk edaralarynyň diagnostika potensialyny güýçlendirmegi meýilleşdirýär.
