Türkmenistanyň Garaşsyzlyk baýramy mynasybetli Türkiýäniň iň gözel sebitleriniň biri bolan Kappadokiýada asmana uçurylmagy däbe öwrülen äpet howa şarynda Türkmenistanyň Baýdagy parlady diýip, ORIENT habar berýär.
Uçurylan howa şarynyň ýüzüne: "Türkmenistanyň Garaşsyzlyk güni bilen! Türkmen-türk dost-doganlygy güllesin!" diýen ýazgy ýazylypdyr. Bu gözel pursatlar "Türkmenfilm" birleşiginiň Magtymguly Pyragy barada düşürýän dokumental filmine hem giriziler. Filmiň Türkiýede düşürilýän bölegini kinorežissýor Hekim Alowowyň ýolbaşçylygyndaky döredijilik topary düşürýär. Döredijilik topary Türkiýede Magtymgulynyň ömri we döredijiligi baradaky maglumatlary özünde jemleýän materiallary we Kappadokiýada Türkmenistanyň Garaşsyzlygynyň 32 ýyllyk baýramynyň bellenişini wideoşekillere geçirýär.
Magtymguly barada film surata düşürýän başga bir döredijilik topary Eýranda degişli işleri alyp barýar. Olar goňşy ýurduň Gülüstan sebitiniň Aktokaý obasynda birnäçe wideoşekili ýazga geçirdiler. Mälim bolşy ýaly, bu ýerde iki sany türkmen akyldary Magtymguly Pyragynyň we onuň kakasy Döwletmämmet Azadynyň aramgähi ýerleşýär.
