Awgust aýynda ÝB ýurtlarynda 165 165 elektromobil satyldy. Ýewropanyň awtomobil öndürijileriniň assosiasiýasynyň (ACEA) maglumatlaryna görä, bu geçen ýylyň awgust aýy bilen deňeşdirilende, 118,1% köpdür. Ilkinji gezek ÝB-de satylan awtomobilleriň umumy sanynda elektromobilleriň paýy 20%-den geçdi diýip, kommersant.ru belleýär.
ACEA-nyň belleýşi ýaly, Maltadan daşary ÝB-niň ähli bazarlary elektromobil satuwynda ýyllyk hasabynda iki we üç belgili ösüşi görkezdi. Iň uly ösüş Belgiýada hasaba alyndy – 224,5%. Ýewropanyň iň uly bazary bolan Germaniýada elektromobil satuwy 170,7% ýokarlandy. ACEA-nyň maglumatlaryna görä, ýylyň başyndan bäri ÝB ýurtlarynda tas 1 mln elektromobil satyldy.
Awgust aýynda, umuman, awtomobil satuwy hem ýokarlandy. Geçen aý 787,6 müň awtomobil satyldy, bu bolsa 2022-nji ýylyň awgust aýyna garanyňda 21% köpdür. Hünärmenler, aýratynam, awgust aýynyň awtomobil satuwy üçin ýylyň iň gowşak aýlarynyň biridigini göz öňünde tutup, bu görkezijini örän ýokary diýip hasaplaýarlar.
ACEA awgust aýynyň awtomobil satuwynyň ösüşi boýunça yzygiderli 13-nji aýdygyny belleýär. Uly bazarlaryň arasynda bu döwürde satuw Germaniýada (+37,3%), Fransiýada (+24,3%) we Italiýada (+11,9%) işjeň ýokarlandy. Volkswagen Group awtomobil öndürijisiniň satuwy 21,2% ýokarlandy, kompaniýa 209,5 müň awtomobil satyp, 26,6% bazar paýyny saklady. Ikinji uly öndüriji Stellantis-iň satuwy 6,4%, Renault Group-yňky 22,3% ýokarlandy.
