Lozannanyň Federal politehniki mekdebiniň alymlary ölüm howply «E. coli» bakteriýasyndan ilkinji gezek elektrik energiýasyny almagy başardylar. Munuň üçin bioinženeriýa tehnologiýalary arkaly onuň düzümi üýtgedildi.
Tebigatda tebigy ýollar bilen elektrik energiýasyny öndürýän ekzotik mikroblar bar. Emma munuň üçin olara aýratyn daşky gurşaw şertleri gerek.
«E. coli» aşgazan taýajygy dürli çeşmelerde ösüp bilýär. Oňa täze häsiýetleri bermek üçin gözlegçiler öýjükden daşary elektron geçirmek (EET) atly usuly ulandylar.
Alymlar «Shewanella oneidensis MR-1» bakteriýasynyň (elektrik öndürýän bakteriýa) komponentlerini bölüp aldylar we öýjügiň içki hem-de daşky membranalaryny öz içine alýan optimal ýoly döretdiler. Netijede, öndürilýän elektrik togunyň möçberini üç esse artdyrmagy başardylar.
«E. coli» dürli gurşawlarda, şol sanda hapa suwda hem elektrik energiýasyny öndürmegi başardy. Ekzotik bakteriýalar beýle şertlerde ýaşap bilmediler, aşgazan taýajygy bolsa bu şertde ösmegini dowam etdi diýip, «Joule» habar berýär.
«Biz elektrik energiýasyny öndürýäris, şol bir wagtyň özünde bolsa organiki galyndylary gaýtadan işleýäris – bir okda iki towşan awlaýarys» diýip, ylmy işiň awtorlary bellediler.
