Wenesiýa myhmanlaryň şähere girişi üçin petegiň bahasyny we 2024-nji ýylyň ýazyndan hereket edip başlajak düzgünleri mälim etdi. Bu barada CNN habar berýär diýip, “Ýewropeýskaýa prawda” ýazýar.
Şäher syýahatçylaryň sanynyň aşa köpdügi sebäpli taryhy bölegine giriş üçin töleg almagy meýilleşdirýär. Bahasy 5 ýewro bolan petekler ilki “synag görnüşinde” bolar we diňe belli bir günler hereket eder. Öň, şäheriň taryhy bölegine giriş üçin 10 ýewro çenli töleg teklip edilipdi.
Petekler ilkinji gezek 2024-nji ýylyň ýazyndan 30 günlük synag görnüşinde giriziler. Ol şäher häkimliginiň çaklamalary boýunça syýahatçylaryň has köp boljak günleri (meselem, dynç günleri we karnawal günleri) hem-de Wenesiýada bir gijäni geçirmeýänler üçin zerur bolar.
Bu belli günlerde taryhy şähere giriş 14 ýaşdan uly adamlar üçin tölegli bolar, ýöne bu ýerli ýaşaýjylara, işe yzygiderli gidýänlere, gozgalmaýan emläk eýelerine, şäherde gijäni geçirýän syýahatçylara, sport ýaryşlaryna gatnaşyjylara degişli bolmaz. Bu myhmanlar barybir onlaýn hasaba alynmaly bolarlar.
Şäher häkimliginiň syýahatçylyk meseleleri boýunça geňeşçisi Simone Wenturini bu üýtgeşmeleriň şäher ýaşaýjylary we beýleki gyzyklanma bildiren taraplar bilen maslahatlaşmalardan soň ylalaşylandygyny düşündirdi.
