Russiýada garpyzyň, gawunyň, gök önümleriň we miweleriň ýetişenlik derejesini kesgitlemäge mümkinçilik berýän ykjam goşundy döredildi diýip, Izwestiýe neşiri habar berýär.
Moskwanyň Fizika we Tehnologiýa Uniwersitetiniň (MFTI) Telekommunikasiýa gözleg merkeziniň öňdebaryjy ylmy işgäri Dmitriý Filonow bu programma ýetişenlik derejesini özlerinden geçýän Wi-Fi signalynyň derejesi boýunça kesgitleýändigini düşündirdi.
Onuň sözlerine görä, garpyzyň, gawunyň, gök-önümleriň we miweleriň bitewiligini bozmazdan, hiline baha bermek zerur bolanda, bu programma peýdalydyr. Satyn almazdan ozal, garpyz bilen gawuny kesip görmäge rugsat berilmese, bu ykjam goşundy size kömege ýeter.
«Ýetişenligiň fiziki we himiki ölçeglerini tapawutlandyryp bolýar. Mysal üçin, miweler bişensoň, olarda şekeriň mukdary köpelýär. Bu miwäniň içki gurşawynyň dielektrik aýratynlyklaryny üýtgedýär. Bu häsiýetler önümden geçýän Wi-Fi signalynyň derejesine täsir edýär. Aslynda, antenna ykjam analizator. Onuň doly işlemegi üçin şu ýerine ýetirilen programma üpjünçiligi ýazylmalydy» - diýip, Dmitriý Filonow aýtdy.
