27-nji iýulda Aziýanyň Futbol Konfederasiýasynyň merkezi edarasynyň ýerleşýän ýeri bolan Kuala-Lumpur şäherinde 2026-njy ýylda geçiriljek futbol boýunça dünýä çempionatynyň saýlama tapgyrynyň bije çekişlik dabarasy geçirildi. Bu barada Türkmenistanyň Futbol federasiýasynyň saýty habar berdi.
Onuň netijesinde saýlama tapgyrçasynda “E” toparça düşen Türkmenistanyň milli ýygyndysy Eýranyň hem-de Özbegistanyň ýygyndy toparlary bilen güýç synanyşar. Bu toparçanyň dördünji wekili birinji saýlama tapgyrynda güýç synanyşjak Gonkonk bilen Butanyň milli ýygyndylaryň arasyndaky ýeňiji bolar.
Ýeri gelende bellesek, 2026-njy ýylda geçiriljek dünýä çempionatynyň final tapgyrynda ilkinji gezek milli ýygyndylaryň 48-si çykyş eder. Munuň bilen bagly Aziýanyň Futbol Konfederasiýasy saýlama tapgyrynyň geçiş tertibine birnäçe üýtgeşmeleri girizdi. Muňa laýyklykda, AFK-nyň çägine girýän milli ýygyndylarynyň 45-siniň iň pes reýtingde duranlarynyň 18-si saýlama tapgyryna birinji aýlawdan başlar.
Saýlama tapgyrynyň birinji aýlowynda ýygyndylaryň 18-si 9 jübüti emele getirer. Olaryň hersinde öz meýdanynda hem-de myhmançylykda duşuşyklar geçiriler. Bu duşuşyklar şu ýylyň 12-nji hem-de 17-nji oktýabry aralygynda dowam eder. Bu duşuşyklarda ýeňiş gazanan ýygyndy toparlara saýlama tapgyrynyň ikinji tapgyrynda reýtingde ýokarda duran ýygyndylaryň 27-si goşular. Ikinji tapgyrda ýygyndylaryň 36-sy 9 toparçany emele getirerler (4 ýygyndy topardan). Ýygyndy toparlaryň hersi toparçalaýyn bäsleşikde duşuşyklaryň altysyny geçirerler. Bu duşuşyklar 2023-nji ýylyň noýabry bilen 2024-nji ýylyň iýun aýlarynda geçiriler.
Saýlama tapgyrynyň ikinji aýlowynyň jemi boýunça toparçalarda ilkinji iki orny eýelän ýygyndy toparlar dünýä çempionatynyň saýlama oýunlarynyň üçünji tapgyryna çykyp, şol bir wagtda 2027-nji ýylda geçiriljek Aziýa Kubogynyň final tapgyrynda çykyş etmäge mümkinçilik alarlar.
Dünýä çempionaty – 2026-nyň saýlama oýunlarynyň üçünji tapgyrynyň bije çekişligi 2024-nji ýylda geçiriler. Onuň netijesinde ikinji aýlowy şowly geçen ýygyndy toparlaryň 18-si toparçalaryň üçüsinde (6 ýygyndy topardan) çykyş ederler. Onuň netijesinde her toparçada ilkinji iki orny eýelän ýygyndylaryň altysy dünýä çempionatynyň final tapgyryna gatnaşmaga hukuk gazanar. Dünýä birinjiliginde çykyş etjek Aziýanyň wekilleriniň ýene-de ikisi dördünji aýlowyň netijesinde belli bolar. Mundan başga-da, yklymara geçiriljek duşuşyklaryň netijesinde şowly çykyş eden ýagdaýynda AFK-nyň ýene-de bir wekili dünýä birinjiliginiň final tapgyrynda çykyş etmäge mümkinçilik alar.
