Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň hasabyndan paýtagtymyzdaky Halkara saglyk merkezleri müdirýetiniň halkara kardiologiýa merkezinde, Enäniň we çaganyň saglygyny goraýyş ylmy-kliniki merkezinde, ýurdumyzyň ähli welaýatlarynda dürli kesellerden ejir çekýän çagalara ýerli hünärmenler tarapyndan hirurgiki bejeriş amallary üstünlikli ýerine ýetirildi hem-de bu işler dowam etdirilýär.
Çagalaryň her biri degişli hassahanalarda nobatdaky dikeldiş bejergilerini almaklaryny dowam etdirip, sagdyn çagalaryň hataryna goşulýarlar. Bejergi alan çagalar «Awza» milli syýahatçylyk zolagyndaky «Daýanç» çagalar sagaldyş merkezine iberiler. Bu barada Türkmenistanyň Saglygy goraýyş we derman senagaty ministrliginiň Habarlar merkeziniň müdiri Ogülmähri Geldiýewa «Türkmenistan» gazetinde makalasynda habar berdi.
Türkmenistanyň saglygy goraýyş we derman senagaty ministrligi tarapyndan Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň milli we daşary ýurt pullarynda hasaplary açylyp, bu gaznanyň hasabyndan çagalaryň saglygyny dikeltmäge bellenilen we berlen maliýe serişdeleriň hasabyna 140-dan gowrak dürli dogabitdi kesellerinden ejir çekýän çagalara lukmançylyk amallary ýerine ýetirildi.
Şeýle hem 50-den gowrak çaga saglygy goraýyş öňüni alyş barlaglar geçirilip, olar saglygy goraýyş maksatly serişdeler bilen üpjün edildi. Bu ugurdaky işler dowam etdirilýär.
