Şu gün Türkmenistanyň Ylymlar akademiýasynyň Tehnologiýalar merkezinde «Mahabat üstünligiň açary» atly festiwalyň jemleri jemlenildi. Onuň netijeleri boýunça öň yglan edilen bäsleşikde ýeňiş gazanan iň gowy mahabat önümleri yglan edildi.
Dabaranyň dowamynda Mahabat müdirliginden, «Turkmenportal» hojalyk jemgyýetinden, «Mahabatly Ulaglar» kärhanasyndan, TmCars-dan wekiller çykyş edip, mahabat ulgamyndaky bilimleri hem tejribeleri bilen paýlaşdylar.
Bäsleşigiň jemleri boýunça Yhlas Kerimow, Muhammet Begenjow, Nurahmet Kakageldiýew, Arslan Oraztaganow Baş baýraga mynasyp boldular. Ýene-de on adama degişli derejelerdäki dilomlar we baýraklar gowşuryldy.
Öň habar berşimiz ýaly, Türkmenistanyň Bilim ministrligi, Magtymguly adyndaky Ýaşlar guramasy we Türkmenistanyň Senagatçylar we telekeçiler birleşmesi tarapyndan okuwçylaryň, talyplaryň, ýaş hünärmenleriň, zehinli ýaşlaryň, telekeçi ýaşlaryň, alym ýaşlaryň, ýaşlar kärhanalarynyň arasynda iň oňat mahabat önümini we mahabat nusgalaryny döretmek boýunça «Mahabat üstünligiň açary» atly festiwalyň çäklerinde bäsleşik yglan edilipdi.
