26-njy maýda Bakuda konsullyk meseleleri boýunça türkmen-azerbaýjan maslahatlaşmalary geçirildi. Oňa Türkmenistanyň we Azerbaýjanyň daşary syýasy edaralarynyň konsullyk gulluklarynyň ýolbaşçylary gatnaşdy. Bu barada türkmen daşary syýasat edarasynyň saýty habar berýär.
Maslahatlaşmalaryň dowamynda taraplar özara gyzyklanma bildirilýän konsullyk meselelerini, Türkmenistanyň raýatlarynyň Azerbaýjandaky we Azerbaýjanyň raýatlarynyň Türkmenistandaky hukuk ýagdaýlaryny, Azerbaýjanda okaýan türkmen talyplarynyň meselelerini we ş.m. ara alyp maslahatlaşdylar. Gün tertibine laýyklykda, Türkmenistanyň döwlet migrasiýa gullugy bilen Azerbaýjanyň migrasiýa gullugynyň arasynda hyzmatdaşlygy mundan beýläk hem ösdürmek we tejribe alyşmak meselelerine seredildi.
Duşuşygyň netijeleri boýunça konsullyk maslahatlaşmalaryň Teswirnamasyna gol çekildi.
