17-nji maýda Russiýa Federasiýasynyň Türkmenistandaky täze bellenen Adatdan daşary we Doly ygtyýarly Ilçisi Iwan Wolynkini Türkmenistanyň Daşary işler ministriniň wezipe borçlaryny wagtlaýyn ýerine ýetiriji Wepa Hajiýewe ynanç hatlarynyň nusgalaryny gowşurdy.
W.Hajiýew Ilçini ýokary diplomatik wezipä bellenmegi bilen gutlap, täze wezipesinde alyp barjak işlerinde ýardamlary we goldawy bermäge taýýardygyny nygtady.
Diplomatlar özara gatnaşyklaryň ähli ugurlary boýunça yzygiderli ösýän türkmen-rus strategiki hyzmatdaşlygynyň häzirki gün tertibini ara alyp maslahatlaşdylar.
Diplomatlar ikitaraplaýyn söwda-ykdysady hyzmatdaşlygyň yzygiderli ösýändigini bellediler. Bu ugurdaky gatnaşyklary ösdürmegiň çäginde Ykdysady hyzmatdaşlyk boýunça türkmen-rus hökümetara toparyna möhüm orun berilýär.
Ikitaraplaýyn hyzmatdaşlygyň iň möhüm ugry medeni-ynsanperwer gatnaşyklary bolup durýar. Bu ugurda, taraplar bilim, ylym we medeniýet pudagynda hyzmatdaşlygyň ýokary derejesini beýan etdiler.
