Russiýanyň «RŽD» açyk paýdarlar jemgyýeti Türkmenistana gurluşygy dowam edýän Arkadag şäheri bilen Aşgabadyň arasynda sagatda 140 km tizlik bilen hereket edýän otly gatnawyny guramak boýunça taslamany teklip etdi. Bu barada çarşenbe güni «RŽD» açyk paýdarlar jemgyýetiniň baş müdiriniň birinji orunbasary Sergeý Pawlow habar berdi.
"Biz [türkmen kärdeşlerimiz bilen] birnäçe resminama gol çekişdik we häzirki wagtda kärdeşlerimiz bilen olaryň üstünde işleýäris. <...> Infrastrukturanyň ösüşi barada aýdanymyzda, Gyzylarbatdaky awtoulag abatlaýyş zawodyny döwrebaplaşdyrmak synag taslamasy hökmünde bilelikde geçirildi. Bu meseläniň çözülmegi agzalan kärhananyň kuwwatyny birnäçe esse artdyrmaga mümkinçilik berer hem-de wagonlara hyzmat edilişiniň we häzirki zaman gatnawlarynyň ýokary derejesini üpjün eder. Şeýle hem, sebitdäki ýolagçy demir ýol ekspresini elektrikleşdirmek, ösdürmek boýunça birnäçe taslamany teklip edýäris, otlularyň sagatda 140 km tizlik bilen hereket etmegini guramagyň ýollaryna seredýäris "- diýip, ol "Halkara ulag-üstaşyr geçelgeleri: özara arabaglanyşyk we ösüş - 2023" konferensiýasynda çykyş edende aýtdy.
Pawlowyň konferensiýada hödürlän materiallarynda aýdylyşy ýaly, sebitde ýolagçy demir ýol ekspres otlusyny guramagyň taslamasy Türkmenistanyň paýtagty bilen Arkadag şäheriniň arasyndaky gatnawy döretmegi göz öňünde tutýar. Ýoluň meýilleşdirilýän wagty 18 minut (şäherleriň arasyndaky aralyk takmynan 30 km).
