Apple kompaniýasy Braziliýada iPhone 14 seriýasynyň smartfonlaryny ýygnap başlady. Gurluş San-Pauludaky Foxconn Brazil fabrikasynda ýygnalýar. Apple önümleriniň, şol sanda iPhone smartfonlarynyň önümçiliginiň köp bölegi häzirem Hytaýyň paýyna düşýär.
Soňky ýyllarda Apple Braziliýa ýaly beýleki ýurtlaryň kömegi bilen üpjünçilik zynjyryny üýtgetmäge çalyşýar. Amerikan kompaniýasy ýurtda iPhone smartfonlaryny ýygnama işlerini ýola goýdy diýip, 9to5Mac portaly ýazýar.
Braziliýadaky MacMagazine blogynyň okyjylarynyň biri 128 Gb-lyk gök iPhone 14 smartfonyny satyn alandygyny we gurluşyň San-Pauluda ýerleşýän Foxconn Brazil kompaniýasy tarapyndan ýygnalandygyny belledi. Smartfonyň böleginiň belgisi "BR/A" bilen gutarýar - bu onuň ýurduň çäginde ýygnalandygyny tassyklaýar.
Ýöne portalyň anyklamagyna görä, Braziliýada diňe esasy iPhone 14 hatary ýygnalýar. 14 Pro ýa-da 14 Plus modelleri "BR/A" identifikatory bilen ýerli fabrikada öndürilmeýär. Hytaýdan getirilen telefonlar "BZ/A" ýa-da "BE/A" bellikleri bilen bellenilýär.
Apple Braziliýada smartfonlary ilkinji gezek ýygnanok. 2022-nji ýylda kompaniýa iPhone 13 we iPhone SE smartfonlaryny hem şeýle etdi. Bu ýerli hökümetiň import önümleri üçin ýokary salgytlary girizmegi bilen baglanyşyklydyr, bu önümlere bolsa Apple-iň ähli gurluşlary diýen ýaly degişli.
Käbir kompaniýalar harydynyň bahasyny we salgytlary azaltmak üçin önümiň ýurduň çäginde ýygnalmagyna maýa goýýar. Şeýlelikde, Hytaýda ýygnalan 128 Gb iPhone 14 alyja 1,5 müň dollara, ýerli fabrikada ýygnalan smartfon bolsa 1 müň dollara düşer.
Şeýle etmek bilen kompaniýa Hytaýa-da garaşlylygyny azaldýar. Ol ýerdäki kärhanalar COVID-19-a garşy berk syýasat sebäpli zyýan çekdiler. 2022-nji ýylyň noýabryndaky närazylyklar sebäpli Apple 6 mln töweregi iPhone Pro-ny ýitirdi. 2022-nji ýylyň sentýabr aýynda kompaniýa önümçiliginiň bir bölegini Hindistana geçirdi.
