Awstraliýanyň we Ýaponiýanyň alymlar topary 8336 m çuňlukda deňiz slizenleri maşgalasyndan bolan bir balygy surata aldylar. Bu barada duşenbe güni gözleg işine gatnaşan Günbatar Awstraliýa uniwersitetiniň metbugat gullugy tarapyndan habar berildi.
Şeýlelik bilen, Mariana çuňňulynda 8178 m çuňlukda deňiz slizeni surata düşürilende 2017-nji ýylyň rekordy täzelendi.
2022-nji ýylyň güýzünde Günbatar Awstraliýa uniwersitetiniň we Tokionyň Okeanografiýa uniwersitetiniň alymlary gözleg gämisinde iki aýlyk ekspedisiýa geçirdiler. Topar çuňlukda ýüzýän deňiz suwasty gämilerini ulanyp, Ýuwaş ummanyň ýapon kenarýakasyndaky iki ýerde - Rýukýuda we Idzu-Ogasawarada balyklaryň köpelişini öwrendi.
Topar Ýaponiýanyň günortasyndaky Idzu-Ogasawara çuňňulynda Pseudoliparis balyklaryny rekord çuňlukda wideo ýazga geçirmegi başardy. Ýaş deňiz slizenleri, çuň ýerde ýaşaýan beýleki deňiz balyklaryndan tapawutlylykda, ululara garanyňda has çuňluklarda ýaşaýar. Şol bir wagtyň özünde Günbatar Awstraliýa uniwersitetiniň professory Alan Jeýmison Mariana çuňlugynyň 8 müň metrden gowrak düýbünde deňiz slizenleri seýrek duş gelýän bolsa, Ýaponiýanyň kenarýakasyndaky çuňňullarda şol bir çuňlukda olaryň giň ýaýrandygyny belleýär.
Şeýle hem, ekspedisiýa wagtynda alymlar Pseudoliparis belyaevi görnüşiniň iki sanysyny Ýapon çuňňulynyň 8022 m düýbünden çykaryp almagy başardylar. Metbugat beýanynda bellenip geçilişi ýaly, alymlar ilkinji gezek 8 müň metrden gowrak çuňlukda balyk tutmagy başardylar we deňiz slizenleriniň bu görnüşi ozal iň aňrybaş 7703 m çuňlukdan (2008-nji ýylda) tapyldy.
