Aşgabatda Türkmenistanyň Daşary işler ministri Raşid Meredowyň hem-de Özbegistanyň Daşary işler ministriniň wezipesini ýerine ýetirijisi Bahtiýor Saidowyň ýolbaşçylygyndaky wekiliýetleriň gatnaşmagynda iki ýurduň daşary syýasat edaralarynyň syýasy geňeşmeleri geçirildi.
Geňeşmeleriň dowamynda ikitaraplaýyn hyzmatdaşlygyň häzirki ýagdaýy we geljegi, şol sanda öň ýetilen ylalaşyklaryň ýerine ýetirilişi bilen bir hatarda syýasy gatnaşyklaryň giňeldilmegi we olary amaly taýdan baýlaşdyrylmagy bilen bagly meselelere garaldy.
Diplomatlar ikitaraplaýyn gatnaşyklar boýunça pikir alyşmak, garaýyşlary ylalaşmak hem-de özara gyzyklandyrma bildirýän derwaýys halkara we sebitleýin meseleler boýunça syýasy geňeşmeleri ýygy-ýygydan geçirmek ugrunda çykyş etdiler.
Taraplar Türkmenistan bilen Özbegistanyň köp sanly halkara we sebitleýin meseleler boýunça garaýyşlarynyň ýakyndygy ýa-da meňzeşdigi barada pikirdeş boldular.
Söwda-ykdysady hyzmatdaşlyk bilen bagly meselelere seredilende, soňky ýyllarda haryt dolanyşygynyň barha artdyrylandygy barada kanagatlanma bilen aýdyldy.
Ýurtlaryň sebitleriniň arasynda göni söwda-ykdysady gatnaşyklaryň çuňlaşdyrylmagynyň hem-de özara çäreleriň we duşuşyklaryň sebit derejesinde dowam etdirilmeginiň ähmiýeti bellenildi. Şol bir wagtyň özünde serhede ýakyn söwda mümkinçilikleriniň doly derejede ulanylmagynyň ýerlikliligi beýan edildi.
Gepleşikleriň dowamynda daşary syýasat edaralarynyň ýolbaşçylary geljekde dürli derejelerde geçiriljek bilelikdäki çäreleriň we duşuşyklaryň senelerine seretdiler.
