Türkmenistanyň Prezidenti Serdar Berdimuhamedow hem-de türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Li Sýany Hytaý Halk Respublikasynyň Döwlet Geňeşiniň Premýeri wezipesine bellenilmegi bilen gutladylar. Bu barada «Watan» habarlar gepleşiginde habar berildi.
Serdar Berdimuhamedow gutlagynda: «Biz Hytaý Halk Respublikasy bilen ýola goýlan strategik gatnaşyklary mundan beýläk-de pugtalandyrmaga aýratyn ähmiýet berýäris. Ikitaraplaýyn hyzmatdaşlygymyzy giňeltmek üçin bar bolan uly mümkinçilikleri durmuşa geçirmek arkaly bilelikde tagalla etmäge taýýardygymyzy beýan edýärin» — diýip nygtady.
Öz gezeginde, Gurbanguly Berdimuhamedow: «Biz Türkmenistan bilen Hytaý Halk Respublikasynyň arasynda ýola goýlan gatnaşyklaryň derejesine ýokary baha berýäris. Türkmen-hytaý köpugurly hyzmatdaşlygynyň bilelikdäki tagallalarymyzyň netijesinde geljekde-de halklarymyzyň bähbidine ösdüriljekdigine berk ynanýaryn» — diýip belledi.
Öň habar berşimiz ýaly, Halk wekiliýetleriniň Ählihytaý ýygnagynyň barşynda HHR-iň Döwlet Geňeşiniň täze premýer-ministri wezipesine (ýurduň iň ýokary ýerine ýetiriji edarasy) Li Sýan saýlandy.
