17-nji fewralda Daşary işler ministrliginiň binasynda Türkmenistanyň Bütindünýä Söwda Guramasyna (BSG) goşulmagy bilen bagly meseleleri öwrenmek boýunça Hökümet toparynyň nobatdaky mejlisi geçirildi. Duşuşyga degişli ministrlikleriň we edaralaryň wekilleri gatnaşdy.
Duşuşygyň dowamynda, oňa gatnaşyjylar Hökümet toparynyň 2022-nji ýyldaky işleriniň jemlerine hem-de 2023-nji ýylyň möhüm başlangyçlaryna garadylar.
Mälim bolşy ýaly, Türkmenistan 2020-nji ýylyň iýul aýynda BSG-da synçy derejesine eýe boldy, 2022-nji ýylyň fewralynda BSG-niň Ženewada geçirilen Baş Geňeşiniň nobatdaky mejlisinde ýurdumyz BSG-niň doly agzasy bolmak üçin ýüz tutdy. Netijede, Türkmenistana Bütindünýä söwda guramasyna goşulyşýan döwlet («işjeň synçy») derejesini bermek kararyna gelindi.
Türkmenistanyň BSG-ä agza bolmagy üçin taýýarlyk çärelerini tamamlamak boýunça uly göwrümli wezipeleri ýerine ýetirmegiň meýilleşdirilendigi nygtaldy. Çärä gatnaşyjylar BSG-ä girmegiň şertleriniň biri Türkmenistanyň daşary söwda şertleri boýunça Ähtnamany taýýarlamak üçin möhüm başlangyçlaryny ara alyp maslahatlaşdylar. Şeýle hem, ýurduň ministrlikleriniň birinde agentlik ýa-da ýörite düzüm birligini döretmek meselesine garamak teklip edildi, bu bolsa biziň ýurdumyzyň BSG-ä girmegi bilen baglanyşykly ähli meseleleri utgaşdyrar.
