Magtymguly adyndaky Türkmen döwlet uniwersitetinde «QR code» hem-de şol bir wagtda kamera arkaly ýüz tanamagyň netijesinde giriş-çykyş wagtlarynyň elektron hasabatyny bellige almak boýunça «QR-Face elektron hasabat» ulgamy ulanylyp başlandy. Bu barada uniwersitetiň saýtynda habar berilýär.
«QR-Face elektron hasabat» programmasy islendik ulgamda, ýagny okuwçylaryň we talyplaryň, şeýle-de dürli pudaklaýyn edaralarda zähmet çekýän işgärleriň giriş-çykyş wagtlarynyň elektron hasabatyny bellige almak üçin ulanylýar.
Bu programmany Magtymguly adyndaky Türkmen döwlet uniwersitetiniň Maglumat tehnologiýalary fakultetiniň talyplary Türkmenistanyň Ylymlar akademiýasynyň Tehnologiýalar merkeziniň alymlary bilen bilelikde işläp taýýarladylar.
Bu programmanyň şular ýaly mümkinçilikleri bar:
- QR code hem-de ýüzden tanamak arkaly hasaba almak;
- Hasaba alnan işgäriň giriş-çykyş wagtyny bellemek;
- Edaranyň ýolbaşçylaryna ähli işgärler barada elektron maglumat bermek;
- Her günki hasabat boýunça gelen we gelmedikleri aýratynlykda görmek;
- Umumy hasabaty ýöretmek (islendik wagta çenli arhiwde saklamak).
