2023-nji ýylda Türkmenistanda jemi içerki önümiň ösüş depginini 6,5 göterime ýetirmek, şeýle hem milli ykdysadyýetimiziň pudaklaryny we ýurdumyzyň sebitlerini durnukly ösdürmek, önümçilik kärhanalarynyň doly güýjünde işledilmegini gazanmak, täze kärhanalary gurmagyň hasabyna 3 müň-e golaý täze iş orunlaryny döretmek göz öňünde tutulýar. Bu barada «Watan» habarlar gepleşiginde habar berildi.
Şu gün, 10-njy fewralda Serdar Berdimuhamedow 2022-nji ýylda ýurdumyzyň ykdysadyýetini ösdürmek boýunça alnyp barlan işleriň jemlerine bagyşlanyp geçirilen Hökümet mejlisinde 2023-nji ýylda ýurdumyzy durmuş-ykdysady taýdan ösdürmegiň Maksatnamasyna gol çekdi.
Maksatnama laýyklykda, ýurdumyzda daşary söwda dolanyşygynyň möçberini 19,4 milliard amerikan dollaryna ýetirmek meýilleşdirilýär. Şeýle hem kiçi we orta telekeçiligi ösdürmek göz öňünde tutulýar. Jemi içerki önümiň düzüminde (ýangyç-energetika toplumyny goşmazdan) hususy pudagyň paýyny 71,3 göterime ýetirmek meýilleşdirilýär.
Mundan başga-da, zähmet haklarynyň, pensiýalaryň, döwlet kömek pullarynyň we talyp haklarynyň möçberini 10 göterim ýokarlandyrmak arkaly ilatyň girdejilerini artdyrmak, ýaşaýyş-durmuş derejesini gowulandyrmak göz öňünde tutulýar.
