Penşenbe güni Yslamabatda türkmen ilçisi Atajan Möwlamow Pakistan Yslam Respublikasynyň Federal energetika ministri Hurram Dastgir Han bilen Türkmenistanyň hem-de Pakistanyň arasynda ýangyç-energetika pudagyndaky hyzmatdaşlygy ösdürmegiň geljegini ara alyp maslahatlaşdylar. Bu barada Türkmenistanyň Daşary işler ministrliginiň saýtynda habar berildi.
Diplomat Türkmenistan-Owganystan-Pakistan-Hindistan (TOPH) gaz geçirijisiniň we Türkmenistan-Owganystan-Pakistan (TOP) elektrik geçiriji liniýasynyň gurluşygy barada Pakistan tarapyna habar berdi. Bu taslamalaryň Pakistanyň energiýa howpsuzlygy üçin ähmiýetine ünsi çeken Federal ministr hökümetiniň bu bilelikdäki energiýa maksatnamalaryny doly goldaýandygyny we olaryň çalt durmuşa geçirilmegine gyzyklanma bildirýändigini aýtdy.
Taraplar bu esasy bilelikdäki taslamalaryň — TOPH-nyň we TOP-nyň durmuşa geçirilmegini çaltlaşdyrmak üçin yzygiderli ikitaraplaýyn duşuşyklary we saparlary geçirmegiň möhümdigini bellediler.
Duşuşykda söwda we ykdysady hyzmatdaşlygy mundan beýläk-de ösdürmegiň geljegi ara alnyp maslahatlaşyldy.
