Gateway International kompaniýasynyň wiza merkeziniň resmi saýtynda habar bermegine görä, 2023-nji ýylyň 3-nji ýanwaryndan Türkiýä gitmäge wiza almak isleýän Türkmenistanyň raýatlary ozal zerur bolan resminamalaryň üstüne kepillendiriş edarasy tarapyndan tassyklanylan goşmaça «Ylalaşyk hakynda jarnamany» görkezmeli bolarlar.
“03.01.2023-nji ýyldan Türkiýe Respublikasynyň Aşgabatdaky ilçihanasynyň Türk wiza merkezine wiza almak üçin ýüz tutjak Türkmenistanyň raýatlary kepillendiriş edarasy tarapyndan tassyklanylan goşmaça “Ylalaşyk hakynda jarnamany” görkezmeli bolarlar. Siz wiza almak üçin hökmany bolup durýan “Ylalaşyk hakynda jarnama” bilen biziň web-saýtymyza girip tanşyp bilersiňiz.
Siz “Ylalaşyk hakynda jarnama” resminamasyny biziň wiza merkezlerimizde gol çekilen görnüşdäki arzaňyza goşmalysyňyz.
Siz ähli meseleler boýunça biziň bilen köp sorag berilýän bölümimiz we elektron salgy arkaly habarlaşyp bilersiňiz” diýlip, bildirişde aýdylýar.
Wiza almak üçin arza bermek baradaky goşmaça maglumatlary, şeýle hem şunuň bilen baglanyşykly meselelere jogaplary Türk wiza merkeziniň web-saýtyndan we YouTube kanalyndan tapyp bolar.
Saýt: www.gatewayinternational.com.tr
Elektron salgy: helpline.turkmenistan@gateway.com.tr
Telefon belgi: +99312400212
Türk wiza merkeziniň saýtyndaky maglumatlara görä, bir gezeklik syýahatçylyk wizasynyň bahasy 60 dollar. Köpgezeklik wizanyň bahasy — 190 dollar, bir gezeklik üstaşyr wizanyň bahasy — 60 dollar. Gateway International kompaniýasynyň wiza merkeziniň hyzmat tölegi — 85 dollar.
