10-njy dekabrda Gurbanguly Berdimuhamedow Ahal welaýatynyň täze edara ediş merkezine nobatdaky saparyny amala aşyrdy.
Onuň barşynda Türkmenistanyň Milli Geňeşiniň Halk Maslahatynyň Başlygy ol ýerde alnyp barylýan işler, taýýarlanylan şekil taslamalary, olaryň aýratynlyklary bilen tanyşdy hem-de iş maslahatyny geçirdi. Onda bu iri merkeziň birinji tapgyrynyň tamamlaýjy tapgyrynda dowam edýän gurluşyk işleriniň alnyp barlyşy ara alnyp maslahatlaşyldy.
Ahal welaýatynyň täze edara ediş merkeziniň gurluşygynyň alnyp barylýan ýerinde welaýatyň täze merkeziniň gurluşygy boýunça döwlet komitetiniň başlygy D.Orazow we Ahal welaýatynyň täze edara ediş merkeziniň şäheriniň häkimi Ş.Durdylyýew merkeziň çäklerinde alnyp barylýan köptaraply gurluşyk işleri barada maglumat berdiler.
Gurbanguly Berdimuhamedow bu ýerde merkeziň metjidiniň, ýaşaýyş jaýlarynyň bezeginde ulanyljak mermer daşlarynyň görnüşleri bilen tanyşdy.
Şeýle hem bu ýerde merkeziň bilim ojaklarynda ornaşdyrylýan interaktiw tagtalar görkezildi. Onda geçilýän sapagyň mowzugy, mugallymyň ýumşy we bilim alýan ýaşlaryň berlen ýumşy ýerine ýetirilişi görkezilýär. Mundan başga-da, bu maglumatlar mekdebiň ýolbaşçylary hem-de okuwçylaryň ene-atalary üçin elýeterli bolar.
Gurbanguly Berdimuhamedow merkeziň dükanlarynda onlaýn söwdany gurmak üçin niýetlenen tehnologiýalar bilen tanyşdy.
Halk Maslahatynyň Başlygy Ahal welaýatynyň täze edara ediş merkeziniň birinji tapgyrynyň açylyş dabarasyny türkmen halkynyň milli baýramçylyk ýörelgelerine laýyklykda geçirilmelidigini belledi.
Bu baradaky gürrüňi dowam edip, Gurbanguly Berdimuhamedow merkeziň gurluşygynyň ikinji tapgyryna guramaçylykly girişip, dürli maksatly desgalaryň bina edilmegine örän jogapkärçilikli we häzirki zaman binagärlik tejribesi esasynda çemeleşilmelidigini belledi.
