Ýeriň Blue Marble ("Mawy mermer") atly belli suratyna 50 ýyl boldy. Tegelek ýarym asyr mundan öň - 1972-nji ýylyň 7-nji dekabrynda ony «Apollon-17» missiýasynyň astronawtlary surata düşüripdiler diýip, CNN ýazýar.
Aýa soňky pilotirlenýän uçuş wagtynda NASA-nyň astronawtlary Ýujin Sernan, Ronald Ewans we Harrison Şmitt Hasselblad kamerasynyň kömegi bilen planetany 45 müň km töweregi aralykdan surata almagy başardylar. Älemiň gara boşluk bilen jäheklenen Ýeriň äp-äşger görünýän suraty alyndy. Olara planetany dolulygyna, Aýyň kölegesi ýapmaýan görnüşde surata almak başartdy.
NASA-nyň taryhy bölüminiň işgäri Stiwen Garberiň sözlerine görä, "Apollon-17"-niň ekipažy soňlugy bilen alamata öwrüljek suraty almagy öz öňünde wezipe edip goýmandy. Şeýle-de bolsa 1960-njy ýyllaryň başyndan başlap "Jemini" maksatnamasy (ABŞ-yň pilotirlenýän kosmiki uçuşlarynyň ikinji maksatnamasy) wagtynda NASA ähli astronawtlaryň surata almagy öwrenmegiň okuwyny geçmegini talap edip ugrady. Kosmiki agentlik düşürilen suratlaryň dünýä tejribe bolmagyny, älemiň ägirtligini görkezmegini isleýärdi diýip, Milli awiasiýa we kosmonawtika muzeýiniň kuratory Tizel Mýuir-Garmoni gürrüň berdi.
