Azerbaýjan Respublikasynyň Prezidenti Ilham Aliýew 5-nji dekabrda Türkmenistanyň Ministrler Kabinetiniň Başlygynyň orunbasary, daşary işler ministri Raşid Meredowy kabul etdi.
Raşid Meredow Azerbaýjanyň Liderine Türkmenistanyň Prezidenti Serdar Berdimuhamedowyň we ýurduň Milli Geňeşiniň Halk Maslahatynyň Başlygy Gurbanguly Berdimuhamedowyň gyzgyn salamyny ýetirdi.
Gürrüňdeşligiň barşynda iki ýurduň arasyndaky dostluk-doganlyk gatnaşyklarynyň dürli ugurlarda, şol sanda ykdysady, ulag we ynsanperwerlik babatda üstünlikli ösýändigi bellendi diýip, Azerbaýjanyň baştutanynyň resmi saýtynda habar berilýär. Gepleşiklerde hyzmatdaşlygyň geljegi barada pikir alşyldy.
Şeýle-de, üstümizdäki ýylda Ilham Aliýewiň Aşgabada bolan saparynyň (Hazarýaka döwletleriniň Baştutanlarynyň altynjy Sammitine gatnaşmak üçin) we şonda ikitaraplaýyn gatnaşyklary ösdürmek babatynda Türkmenistanyň ýolbaşçylary bilen geçirilen duşuşyklaryň ähmiýeti nygtaldy.
